7 ліпеня Брылёўская сельская бібліятэка і Брылёўскі сельскі Дом культуры адзначылі дзень нараджэння Народнага паэта Беларусі Янкі Купалы літаратурна-музычнай імпрэзай “З Купалам у сэрцы”. Бібліятэкар Юлія Яцкова распавяла пра жыццёвы шлях паэта, які ўсю моц свайго таленту аддаў беларускаму народу. Прысутныя пазнаёміліся з падрыхтаванай кніжнай выставай і біяграфічным буклетам. У выкананні Мікіты Бакуна, Вікторыі Крэсавай і Міхася Масіеўскага прагучалі вершы Янкі Купалы. Далей быў прадэманстраваны фрагмент новага мастацкага фільма “Купала” кінастудыі “Беларусьфільм”.

У музейна-этнаграфічным пакоі Дома культуры Ю.Яцкова прадставіла тэматычную экспазіцыю “Песні Купалы пад небам брылёўскім”. М. Яцкоў падзяліўся ўспамінамі пра стварэнне цыкла песен на вершы Янкі Купалы, якія склалі зборнік “На вайсковыя матывы”. Удзельнікі сустрэчы даведаліся пра працэс стварэння песні, убачылі рукапісы нотных тэкстаў, а таксама пазнаёміліся з копіямі рукапісаў Я.Купалы, якія спецыяльна былі дасланы М.Яцкову з купалаўскага музея. Асобна былі прадстаўлены кнігі пра творчасць Песняра і буклеты музея Я.Купалы з аўтарскімі прысвячэннямі Сяргея Панізьніка, Яўгена Мазалькова, Валянціны Гапавай і колішняга дырэктара музея, унучатай пляменніцы паэта Жаны Дапкюнас.

Напрыканцы сустрэчы ў аўтарскім выкананні М.Яцкова прагучала некалькі песен з “купалаўскага” цыкла.

9 ліпеня ў Брылёўскай сельскай бібліятэцы прайшла літаратурная гадзіна “Прадвеснік беларускага адраджэння”, прысвечаная 170-годдзю з дня нараджэння аднаго з заснавальнікаў сучаснай беларускай літаратуры Янкі Лучыны. 

Бібліятэкар Юлія Яцкова расказала пра жыццё і творчасць Івана Люцыянавіча Неслухоўскага, які застаўся ў гісторыі беларускай літаратуры пад імем Янкі Лучыны. Ён быў адным з той славутай кагорты беларускіх літаратараў, якія з другой паловы ХІХ стагоддзя рабілі ўсё магчымае, каб беларускае слова, негледзячы на забароны, гучала са старонак друкаваных выданняў і каб першыя крокі маладой беларускай літаратуры былі ўпэўненымі і мэтанакіраванымі.

Да юбілею паэта бібліятэкар падрыхтавала біяграфічны буклет і аформіла кніжную выставу. Удзельнікі сустрэчы чыталі вершы Я.Лучыны і вялі гаворку пра тое, што беларуская літаратура глядзіць у будучыню, памятаючы сваіх заснавальнікаў.

11 ліпеня ў Брылёўскай сельскай бібліятэцы прайшла літаратурная гадзіна “З клопатам пра песні народа”, прысвечаная 225-годдзю з дня нараджэння паэта, драматурга, пачынальніка беларускай фалькларыстыкі Яна Чачота. Бібліятэкар Юлія Яцкова рассказала пра жыццёвы шлях Я.Чачота, які ўвабраў у сябе і паэтычныя ўзлёты, і вялікае сяброўства з паэтам Адамам Міцкевічам, і руплівую працу над зборам і выданнем беларускіх народных песен. Менавіта Я.Чачот быў першым, хто звярнуў увагу на багацце і непаўторнасць вуснай народнай творчасці беларусаў.

Загадчык Брылёўскага СДК Мікалай Яцкоў расказаў пра вучобу Я.Чачота ў Віленскім уніветсітэце, пра яго ўдзел у студэнцкім таемным таварыстве філаматаў і філарэтаў, якое ставіла сваёй мэтай несці асвету і веды ў народ.

Да юбілею бібліятэкар падрыхтавала біяграфічны буклет. Прысутныя пазнаёміліся з кніжнай выставай, чыталі вершы Яна Чачота і з цікавасцю паглядзелі відэафільм “Ян Чачот – дабрадзейны паэт-песеннік”.

14 ліпеня ў Брылёўскай сельскай бібліятэцы прайша літаратурная гадзіна “Светлая песня сэрца”, прысвечаная 110-годдзю з дня нараджэння беларускага паэта і празаіка Паўла Пруднікава. Аб жыцці і творчасці юбіляра расказала бібліятэкар, яна адзначыла, што Павел Іванавіч Пруднікаў наш зямляк – нарадзіўся ў Клімавіцкім раёне і значную частку сваёй паэтычнай творчасці прысвяціў апяванню хараства прыроды роднага краю.

Загадчык Брылёўскага сельскага Дома культуры Мікалай Яцкоў больш падрабязна спыніўся на тым перыядзе жыцця паэта, калі ён па надуманых адвінавачваннях быў арыштаваны ў жніўні 1937 г., па прысуду трапіў у сібірскую высылку на 8 гадоў, але вытрымаў усе нягоды, а потым усё гэта апісаў у сваіх творах-успамінах.

Да юбілею бібліятэкар падрыхтавала біяграфічны буклет і аформіла кніжную выставу, з якой з вялікай цікавасцю пазнаёміліся ўдзельнікі сустрэчы.

16 ліпеня ў Брылёўскай сельскай бібліятэцы прайшла літаратурная гадзіна “Стану песняй у народзе”, прысвечаная 145-годдзю з дня нараджэння беларускай паэтэсы, вядомага дзеяча нацыянальнага адраджэння пачатку ХХ ст. Алаізы Пашкевіч (Цёткі). Бібліятэкар Юлія Яцкова расказала пра жыццё і творчасць Цёткі, якая прыклала вялікія намаганні ў актыўнай барацьбе з царызмам і нацыянальным вызваленні беларусаў. Праз стварэнне беларускіх школ і распаўсюджванне пісьменнасці сярод беларусаў Цётка і яе паплечнікі закладвалі падмуркі беларускай нацыі і будучай беларускай дзяржавы.

Удзельнікі сустрэчы пазнаёміліся з падрыхтаваным біяграфічным буклетам, пагарталі кнігі з аформленай выставы і з цікавасцю паглядзелі відэафільм “Алаіза Пашкевіч (Цётка): урокі жыцця першай беларускай настаўніцы”.

25 ліпеня ў Брылёўскай сельскай бібліятэцы прайшла гадзіна літаратурнага партрэта “На хвалях часу”, прысвечаная 110-годдзю з дня нараджэння вядомага беларускага паэта Анатоля Астрэйкі. Бібліятэкар Юлія Яцкова распавяла пра жыццёвы шлях паэта, пра яго імкненне з дзяцінства да ведаў і чытання, пра першыя крокі ў літаратуры. Паэзія А.Астрэйкі – ясная, меладычная, блізкая да народна-спеўнай інтанацыі, прасякнутая любоўю да радзімы –  заняла сваё ганаровае месца ў беларускай літаратуры.

Загадчык Брылёўскага сельскага Дома культуры Мікалай Яцкоў расказаў пра ўдзел паэта ў партызанскай барацьбе супраць нямецкіх акупантаў, пра тое, як у партызанскай друкарні ўбачыў свет зборнік вершаў А.Астрэйкі “Слуцкі пояс”.

Да юбілею бібліятэкар падрыхтавала біяграфічны буклет і аформіла кніжную выставу, на якой асобна былі прадстаўлены кнігі – юбіляры “Песня дружбы” (65 гадоў) і “Бацька мой Нёман” (60 гадоў).

Завяршыў сустрэчу прагляд дакументальнага фільма “Гэта мы. Анатоль Астрэйка”.

29 ліпеня ў Брылёўскай сельскай бібліятэцы прайшла літаратурна-музычная кампазіцыя “Памяць душы”, прысвечаная 75-годдзю з дня нараджэння вядомага беларускага пісьменніка Віктара Гардзея. Бібліятэкар расказала пра жыццёвы шлях пісьменніка і адзначыла, што ў сваіх творах Віктар Гардзей выступае адданым сынам, шчырым патрыётам палескай зямлі, якая сілкавала і натхняла яго на творчую дзейнасць.

Да юбілею быў падрыхтаваны біяграфічны буклет і аформлена кніжная выстава, дзе ўвагу прыцягнулі кнігі з аўтографамі В.Гардзея. У выкананні чытачоў бібліятэкі Арсенія Пухаленка і Ірыны Дудар прагучалі вершы юбіляра.

Загадчык Брылёўскага сельскага Дома культуры кампазітар Мікалай Яцкоў распавёў пра сваё сяброўства і сустрэчы з Віктарам Канстанцінавічам, пра працу над песнямі на вершы гэтага цудоўнага паэта і прапанаваў паслухаць іх у аўтарскім выканані. І над сцішаным пакоем узняўся перадвосеньскі настрой гардзееўскіх радкоў:

Прыйшоў Пятрок – апаў лісток,
Прыйшоў Ілля – апала два
Зжаўцеў на градцы агурок,
Пажухла ля дарог трава…

31 ліпеня ў Брылёўскай сельскай бібліятэцы прайшла літаратурна-музычная гадзіна “Прыручэнне слова”, прысвечаная 75-годдзю з дня нараджэння вядомага беларускага паэта Алега Салтука. Бібліятэкар Юлія Яцкова расказала пра жыццё паэта, для якога Магілёўшчына дала старт у самастойнае жыццё і ў літаратуру – тут ён скончыў педагагічны інстытут, а ў газеце “Магілёўская праўда” ў 1965 г. па рэкамендацыі Аляксея Пысіна быў надрукаваны першы верш маладога паэта. І ўжо з самага пачатку гэтага творчага шляху стала ясна – у літаратуру прыйшоў адметны сваёй адкрытай душэўнасцю, вернасцю класічным традыцыям, удумлівасцю і мяккім лірызмам паэт, які вельмі сур’ёзна ставіцца да паэтычнага слова.

Да юбілею бібліятэкар падрыхтавала біяграфічны буклет. Удзельнікі сустрэчы ўважліва пазнаёміліся з аформленай кніжнай выставай, дзе асаблівую ўвагу прыцягнулі кнігі з аўтографамі А.Салтука.

Загадчык Брылёўскага СДК Мікалай Яцкоў расказаў пра сяброўства з Алегам Уладзіміравічам, пра сумесную працу над песнямі і выканаў гэтыя спеўныя творы.