13 лютага ў Брылёўскай сельскай бібліятэцы прайшла гадзіна мастацтва “А душа цешыцца прастораю…”, прысвечаная 105-годдзю з дня нараджэння народнага мастака Беларусі Паўла Масленікава.
Бібліятэкар распавяла пра жыццёвы шлях нашага славутага земляка, які пачаўся 14 лютага 1914 года ў вёсцы Нізкая Вуліца Магілёўскага раёна. Атрымаўшы добрую мастацкую адукацыю ў Віцебску і Ленінградзе, Павел Васільевіч выдатна праявіў свае здольнасці ў жывапісу і сцэнічным мастацтве. У гады ваеннага ліхалецця ён быў сярод абаронцаў Масквы, з баямі дайшоў да Германіі. А потым зноўку ўключыўся ў мастацкае жыццё роднай краіны, выхаваўшы не адно пакаленне беларускіх мастакоў. За свае заслугі Павел Масленікаў быў уганараваны высокім званнем Народнага мастака Беларусі, яму была прысуджана Дзяржаўная прэмія Беларусі, а яго імя носіць Магілёўскі абласны мастацкі музей.
Падрыхтаваная кніжная выстаўка прадставіла выданні па творчасці П.Масленікава і мастакоў яго пакалення.
Завяршылася сустрэча праглядам дакументальнага фільма “Музеі Беларусі. Магілёўскі абласны мастацкі музей імя П.В.Масленікава”.